Leído en el acto oficial celebrado el 24 de enero de 2016. Subido a esta web por gentileza de Xosé Ambas -Xosé Antón Martínez Fernández-.
Nunca pensé qu’acabaría dando’l
pregón nesti certame del Quesu d’Afuega’l Pitu de La Foz de Morcín, ser el
pregoneru del Festival que meyor conozo d’Asturies y, atrévome a dicir que del
que menos ediciones perdí na mio vida. Cuento yo que nengún pregoneru
d’ediciones anteriores pisó tantos certames del Quesu d’Afuega’l Pitu como’l
que vos fala. Esto nun ye tirase flores y tampoco se vos tien que facer
extraño, soi de familia quesera y tocóme venir a Morcín cada mes de xineru a
concursar y vender el quesu que tola vida ficimos en casa. El quesu d’Afuega’l
Pitu llegó a Ca Sanchu d’Ambás de la mano de mio madre, natural de Ca Florentu
de Cubia, d’aquella casa salieron cuatro rames de queseres, de les que dos
siguen funcionando en conceyu Grau, La Borbolla y Ca Sanchu.
Preparando esti pregón
siempre tuvi presente la figura d’aquella matriarca que foi la mio güela
materna, María Sabel de Ca Florentu, una de les primeres artesanes moscones que
pisó esti Certame. Pero en Grau tamién nacieron d’aquella otres queserías, como
la de Temia o Llamas, y otros munchos artesanos que baxaben l’Afuega’l Pitu a
los mercaos semanales de la Villa y tamién a esti festival anual de La Foz. Esa
foi la mio familia d’artesanos queseros y con ellos fui conociendo meyor esti
quesu, les sos variantes, la so evolución y mercáu, la cultura asociada al
quesu, la so denominación d’orixe, los sos etiquetaos, la modernización de les
sos queseríes y, hasta fai munchos años, l’intentu de prohibición del Afuega’l
Pitu y la importante llucha de los artesanos y l’alcalde José Sierra de Grau pa
parar aquella llocura propuesta por una clase política asturiana de poco valir
y nengún interés nel valir cultural de la so tierra.
D’esti Certame de La
Foz, del que me siento parte activa de va munchos años, lo que menos me gustó
de siempre foi’l pregón, y equí me tenéis, dándolu na so 36 edición. Los
pregones davezu son llargos, turres, enllenos de referencies bibliográfiques de
xente erúdito, normalmente de personaxes que poco tienen que ver col productu,
con poco respetu pola llingua d’esta tierra, y hasta m’alcuerdo d’ún de los
pregones de Morcín nel qu’un detractor del asturianu comparó la pasteurización
d’esti quesu cola normalización llingüística. D’estos pregones nun m’alcuerdo
muncho porque, como ta faciendo gran parte d’esta carpa nesti momentu, yo
tamién aprovechaba p’allegame hasta’l chigre y convidame colos amigos; pero
cuando Pepe Sariego me convida a ser el pregoneru d’esti añu nun pudi negame
pola importancia qu’esti quesu y esti certame tuvieron y tienen na mio vida.
Yo, que trabayo en
mundu la sanidá pública asturiana, toi fartu de sintir aquello de que la mayor
parte del cuerpu humanu ye agua, d’esta proporción (pongo la cabeza a cortar)
que nel pueblu asturianu una gran parte ye sueru. Bien sabéis qu’Asturies se
conoz de va un tiempu p’acá como’l País de los 40 Quesos gracies
a la bona llabor na dignificación y promoción de los quesos tradicionales. La
mayor mancha quesera d’Europa. Pues esto ye mentira. Asturies, nun tien 40
quesos tradicionales. Tien más. Y precisamente na llabor de recopilación de
cultura tradicional que vengo faciendo de va más 20 años p’acá tamos
alcontrando otres variedaes antigües qu’algún día habrá que recuperar;
viénenseme a la cabeza el Queixo Cocido d’El Valledor o los últimos datos
qu’alcontré na vecina Tameza del Queisu Picón, qu’amasaban añadiendo a la pasta
güevos batíos.
El mundu del quesu
tradicional n’Asturies da pa muncho. La riqueza de variedaes, bien diferentes,
tola cultura asociada al quesu y la mantega, la riqueza de vocabulariu d’esta
llingua nesti campu por ser Asturies un País de llechi… Por eso nun entiendo
cómo con esta riqueza cultural se sigue separando la llingua asturiana de los
nuesos quesos. Por eso nun entiendo cómo l’etiquetáu de la mayoría de los
artesanos queseros asturianos sigue tando en castellano, ensin respetar la
llingua de los qu’hasta esti tiempu conservaron estos tesoros de la gastronomía
asturiana. L’autoodiu del pueblu asturianu pa cola cultura y la llingua propias
fainos tar a años luz d’otres tierres vecines, como Galicia, onde ye impensable
qu’un quesu tradicional nun s’etiquete como Queixo, na llingua propia; y quien
fala de quesu fala d’otros productos que tamién son comparables, como’l vinu
gallegu y la sidra asturiano.
Colos productos
tradicionales de la nuesa gastronomíaa tenemos que vender calidá, identidá y
cultura, vender una Asturies que se quier y se respeta, y tovía tamos mui lloñe
de consiguir esto que ye básico. Alcuérdome d’aquella primera reunión colos
artesanos del Afuega’l Pitu na Conseyería na que yo, igual qu’una mosca
coyonera, ponía pegues a una pila de propuestes que d’habese firmao agora sería
mui difícil cambiar, y ye que los nuesos dirixentes políticos repito que nun
tienen nin gota respetu, amás del escasu conocimientu, a la nuesa realidá
cultural.
D’aquella reunión
colos compañeros del Afuega’l Pitu quedóme marcao pa siempres l’intentu de
acuñar el término Rojo de Trapo o el d’Atroncado Blanco,
pero aquella mosca coyonera d’Ambás llevantó’l brazu pa pidir que les variedaes
tuvieran na llingua’l País y vi la cara d’un padre que casi m’afuega por “meter
la pata” y d’unos políticos que respondieron aquella frase tan ofensiva de:
“Nos ha salido un asturianista”, señores, nun soi asturianista: soi ASTURIANU.
Valga esta experiencia
como exemplu del maltratu cultural qu’Asturies vien sufriendo, de toles maneres
toi bien arguyosu que d’aquella reunión les variedaes Roxu de Trapu o Atroncáu
Blancu, quedaron aceptaes y son les que tán n’usu. Alcuérdome d’una
artesana qu’avergonzada reconocía la forma “roxu” como consecuencia de que
falaren mal, o como tovía diz la güela d’un amigu, “lladraben más que falaben”.
Esti autoodiu reforzáu por esa castra política asturiana que nun reconoz los
nuesos drechos llingüísticos.
Esti pregón quiero
aprovechalu pa convidar a tolos compañeros artesanos del Afuega’l Pitu a
utilizar la llingua asturiana nes sos etiquetes, a usar la nuesa toponimia
porque si a naide se-y pasa pola cabeza llamar Ahoga el Pollo a
este queso, na mesma categoría ta’l ver escritu Grado nes sos
etiquetes.
L’Afuega’l Pitu ta
viviendo un bon momentu. De la denominación d’orixe p’acá otres queseríes
entamen la so actividá nes tierres del centru-occidente y occidente del País;
la gastronomía va cuantayá qu’incorporó l’Afuega’l Pitu con lletres d’oro nes
sos recetes, va muncho qu’el so nome suena fuera de les nueses fronteres y
mocedá ta faciéndose cargo de les vieyes queseríes. Los quesos son d’una calidá
inmeyorable y tán abriéndose nuevos caminos. Namás echo en falta, y por eso
animo a xente d’esti conceyu de Morcín, el volver a abrir la quesería de La
Foz, nesti llugar que tanto fizo y ta faciendo pol quesu d’Afuega’l Pitu.
Nestos años ente’l
quesu fice bonos amigos, xente cola que casi me crié camín de mercaos y
festivales, xente de la mio contorna que trabayó duro na dignificación d’esti
productu; pero hai un nome que se tien qu’escribir con mayúscules na hestoria
d’esti quesu, una persona que yá nun ta con nosotros y a la que-y debemos
muncho tolos artesanos, un amigu que siempre vamos tener na memoria. A FRAN de
Temia dedico esti pregón y les mios palabres. Gracies, compañeru.
MÁS INFORMACIÓN. Pinchar en enlace.
Certamen del Quesu d´Afuega´l Pitu. XXXV edición, 2015.
Certamen del Quesu d´Afuega´l Pitu. XXXVI edición, 2016.
Certamen del Quesu d´Afuega´l Pitu. XXXVI edición, 2016.
"Mientras el tímido reflexiona,
el valiente va, triunfa y vuelve". Proverbio griego.
No hay comentarios:
Publicar un comentario